Mga Manunolat sang Cotabato Nabagatnan (Literary Writers of South Cotabato)

Ang Cotabato Nabagatnan isa ka probinsiya sang Pungsod Pilipinas nga nahamtang sa nabagatnan nga bahin sang Mindanao, rehiyon sang SOCCSKSARGEN.

 Sugod pa sang una nga panahon kag sa pagluntad sang mga dughong tawo sa probinsiya, nagdabong, naglambo na ang taliambong paagi sa mga musika sang Tboli kag Blaan kag bisan pa ang bag-ong taliambong sang mga Kristiyano nga nagpuyo sa kapatagan sang probinsiya.

 Hiligaynon, Blaan, Cebuano, ang nagapanguna nga mga pulong nga ginagamit sa probinsiya. Kapin kulang sa 7, 000, 000 ka mga tawo sa luwas sang pungsod sang Pilipinas ang tumandok nga nagasambit sang pulong Hiligaynon, kag may dugang pa gid nga 4, 000, 000 nga tinuga nga may ikasangkol sa pagsambit sing matalunsay nga Hiligaynon.

 Sa patag sang Literatura, indi likom nga amat-amat na nga nagapanalingsing, nagsanyog ang panulatan. Nagtubo ang mga bag-ong' boses nga nagatipig sa paglumbay sang mga tinaga. Niyan, may mga maukod na nga pamatan-on sa pagpsanyog sa pagbuhat sang bag-ong' porma, lab-as nga mga sugilanon kag mga lokal nga sugilanon. 

 May mga premyado man nga manunolat ang probinsiya sugod pa sang 1940's apang bangod sa kakulangon sang mga impormasyon tuhoy sa mga tigulang nga manunolat, wala ang iban malakip sa mga listahan sang nahauna nga mga manunolat diri sa aton lugar.

    May mga hubon sang manunolat naman nga nagtuhaw nga tubtob subung nagatabang man sa pagpadalagan kag pagpabakod sang katitikan. Madamu naman ang mga manunolat nga nabalhag sa mga pungsudnon, lokal, kag bisan internasyonal nga mga publikasyon, kon sa diin nangin kabangdanan nga nakilal-an ang mga manunolat gikan sa South Cotabato.

Niyan, may pipila na nga nagasulat gamit ang pulong Hiligaynon: ang pulong nga ginasambit sang mga Ilonggo, ukon sa mga katawhan nga nakahangop nga pulong kag nakahibalo sing may katalunsay sa paggamit sini.

Sa blog nga ini, inyo makita ang listahan sang mga manunolat sang probinsiya nga may daku nga kontribusyon sa lokal nga panulatan kag sa pulong Hiligaynon, Filipino kag Ingles.

ADRIAN MEDINA PREGONIR, Banga, South Cotabato

ROMEO ROULLO

Natawo sa San Agustin, Nanunga, Hinigaran, Negros Occidental sadtong Marso 20, 1935. Isa ka mapisan kag maukod nga manunolat sa Hiligaynon Magazine kag YUHUM Magazine. Nakaagom sya sang Pinasahing Padya gikan sa Quin Baterna Literary Contest para sa iya mga sugilanon nga ginbantala, ginbalhag sa ginaamutan nga magazine. Ang mga masunod nga sugilanon nga nakaagom sang padya amo ang masunod: Tuhay nga Duag sang Gugma, Sila Ang Mga Baganihan, Daku nga Baha, Madabong nga Kawayan kag First Prize para sa iya sugilanon nga natitulohan, Demolition. Ang iya nobelita nga Zorayda nakaangkon sang Third Prize sa Tumandok '79 sang YUHUM Magazine. Kapin 150 sa iya mga sugilanon kag 200 nga binalaybay ang nabalhag sa Hiligaynon Magazine. Subong nagapuyo sya sa banwa sang Banga, Cotabato Nabagatnan.

GENEROSO OPULENCIA

Beterano nga manunolat kag isa ka retirado nga Propesor sang Notre Dame of Marbel University. Ang iya binalaybay, Regarding Flowers From La Trinidad, nagdaog sang Ikaduha nga Padya sa paindis-indis sa pagsulat sang binalaybay sang Home Life Magazine  sang 1999, kag sa kasubong nga paindis-indis, sang 2000, nakaangkon sang First Prize ang iya binalaybay nga To a Son Learning the Art of Cooking. Sya nangin Fellow sang 1990 sa Dumaguete National Summer Writers Workshop kag ang iya mga sinulatan nabantala sa nagkalainlain nga mga magazine kag balasahon subong sang Mindanao Harvest, Cotabato Literary Journal kag iban pa.

ESTRELLA TANO GOLINGAY

Naggikan sa banwa sang Surallah si Estrella Tano Golingay, sya may PhD in Language Education kag isa ka retirado nga Propesor sang Notre Dame of Marbel University. Sang 1994, ang iya binalaybay nga, Si Nene at Ako sa Pagitan ng Gabi, nagdaog sa Home Life Magazine Poetry Contest sang First Prize. 

RENATO M. BAGAMAN

Si Renato Bagaman, nagasulat sa Liwayway, isa ka magazine nga nagabalhag sugod sang 1923. Ang iya mga binalaybay kag mga sugilanon nabalhag sa Liwayway kag Hiligaynon sugod pa sang 1940's kag 1950's. Sa karon nagapuyo sya sa Tupi, South Cotabato.

(Nagatinguha sa gihapon subong agod makig-angot sa pamilya agod mahibaluan ang iya banas sa pagsulat. Nakig-angot ako sa editor subong sang Liwayway Magazine kon may mga archive, ugaling kadtuan gid sa Manila Bulletin sa Luzon)

JIM RABORAR

Naggikan sa Syudad sang Koronadal, Cotabato Nabagatnan si Jim Raborar isa ka Manunolat sang Dula (Playwright) kag Direktor sang Apat sa Taglamig Productions Incorporated. Sya katapu sang Committe on Dramatic Arts sang National Commission for Culture and the Arts. Nangin Fellow sa 22nd Iligan National Writers Workshop kag sa 3rd Sulat Dula sa Unibersidad sang Xavier, Dakbanwa sang Cagayan de Oro. Ginsulat niya ang HIV/AIDS stageplay advocacy kag ini ginbelada sa The 1st Incheon Bilingual Theatre Festival sa South Korea sang 2013. Ang iya mga obra ginsakdag man sa Virgin Labfest. Sya subong nagatungod bilang Government Employee sa idalom sang Agricultural Training Institute XII. 

ANNA LIZ CABRIDO

Nagatrabaho sa Provincial Information Office sang Gobyerno Probinsyal si Anna Liz Cabrido nga isa ka manunolat sang dula. Ang iya mga dula ginabelada sang Apat sa Taglamig Productions Incorporated kon sa diin nabitbit sini ang kadungganan sa matag-as nga lebel subong sang pungsudnon kag internasyonal nga mga Festival. Sya nangin fellow sa 3rd Sulat Dula sa Xavier University.

ADRIAN MEDINA PREGONIR

Manunolat sa pulong Hiligaynon, Filipino kag Bisaya si Adrian Medina Pregonir nga naggikan sa Banga, South Cotabato. Sya ang awtor sang zine nga, Erotika Handumanan, kag  Hiligaynon Poetry Easy Recipes, mga hut-ong sang binalaybay nga nasulat sa Filipino, Hiligaynon kag gay language. Nagdaog sya sa Kasingkasing Press Prize for Hiligaynon Flash Fiction nga natitulohan, Ang Maambong nga Lalaki, kag ang iya salaysay nga May Katotohanan Pa Pala nagdaog sa Palanca Awards for Literature sa salaysay kabataan. Nakadawat man sya sang Gawad Rene O. Villanueva para sa Sanaysay kag sang Bantugan sa Panulatan Kinaray-a, First Honorable mnetion kag First prize. Nangin fellow para sa Tula sa Davao Writers Workshop 2018, San Agustin Writers Workshop, Palihang Rogelio Sicat, Kahirupan Bantugan sa Panulatan Kinaray-a kag kabahin sang Tahad: Workshop for Hiligaynon Creative Nonfiction ni Dr. John Iremil Teodoro. Ang iya mga binalaybay nabantala sa nagkalainlain nga mga magasin, antolohiya kag balasahon, amo ang masunod: Liwayway Magazine, Tumandok Hiligaynon, Kasingkasing Nonrequired Reading in the Time of COVID by Kasingkasing Press, WE BEGIN IN AWE: Collection of Reviews, Cultural Center of the Philippines Ani, Spirits of the Philippine Archipelago, Dagmay Journal, TLDTD: Biannual Journal for Filipino Poets, Lakbay: Antolohiya ng Mga Tula by 7 Eyes Productions kag iban pa. Katapu sya sang Manug-isa South Cotabato Writers Organization kag nagatungod bilang correspondent sang YFT Philippines kag DJ/Announcer sang 90.5 FM Good Vibes Radio.

NILYN GAMUZA PACARIEM

Manunudlo kag manunolat si Nilyn Gamuza Pacariem nga nagasulat sa pulong Hiligaynon gikan sa Santo Nino, South Cotabato. Ang iya labing malip-ot nga sugilanon panghamtong, Matam-is nga Handurawan, nagdaog sang Una nga Padya sa 2016 Peter's Prize kag ang iya binalaybay sa Hiligaynon nagdaog man sang Ikatlo nga Padya sa subong gihapon nga paindis-indis. Nangin Co-Author sang Anthology of New Writings from South Cotabato sang Peter Solis Nery Foundation for Culture and the Incorporated. Nangin Fellow sa University of the Philippines Likhaan 40 (Gemino Abad Seminar Workshop on Teaching Literature) nga ginhiwat sa University of the Philippines Diliman. Ang iya mga sinulatan nabantala man sa Cotabato Literary Journal kag nasali sa zine nga The Best of Sulat SOX.

JENNIE ARADO

Naggikan sa Koronadal, Cotabato Nabagatnan si Jennie Arado nga nagatungod bilang Editor sa SunStar Davao Lifestyle Section. Naangkon niya ang BA in English Major in Creative Writing sa University of the Philippines Mindanao. Ang iya sugilanon, Ang Dako nga Yahong Sang Batchoy nagdaog sa South Cotabato Children's Story Writing Contest. Sya nangin Fellow sa University of Santo Tomas National Writers Workshop 2016 kag ang iya mga sinulatan nabantala sa nagkalainlain nga mga journal kag balasahon. 

DAVID JAYSON OQUENDO

Naggikan sa Polomolok, South Cotabato ang mamalaybay kag ficcionista nga si David Jayson Oquendo kag nagpuyo sa Syudad sang Davao agod magtrabaho bilang Electrical Engineer kon sa diin iya natapos nga kurso sa Mindanao State University. Ang iya mga sinulatan nabantala sa Philippine Daily Inquirer, Voice and Verse Poetry Magazine, Dagmay kag Cotabato Literary Journal kon sa diin nagasilbi sya bilang mamantala sa Fiction. Sya nangin Fellow sa Cebu Writers Workshop, Davao Writers Workshop, kag Silliman University National Writers Workshop.

NAL ANDREA JALANDO-ON

Nagbutho si Nal Jalando-on, isa ka ficcionista, sa Ateneo de Davao University kag aktibo nga katapu sang Society of Ateneo Literature and English Majors (SALEM). Ang iya mga sinulatan nabantala sa Dagmay, Cotabato Literary Journal kag iban pa. Sya nangin Fellow sang Iligan National Writers Workshop, kag ang iya sugilanon, Ang Paborito ni Daddy, nakaangkon sang Jimmy Balacuit Literary Award. Sya isa ka Ilongga nga nagasulat sa pulong Hiligaynon kag Ingles.

PHILIP JAY LEANO

Isa sa pipila ka maukod nga batan-ong' mamalaybay, manunolat, kag balagtasero si Philip Jay Leano gikan sa Tantangan, South Cotabato. Nagsugod bilang Spoken Word Poetry Artist kag ginpasidunggan bilang tagdaog sa Mga Bagatnong Sugilanon sang Tnalak Festival 2019, Hinugyaw Festival 2020, PICPA South Cotabato Spoken Word Poetry Contest, Koronadal City Meet Spoekn Poetry Contest kag iban pa. Nangin Pungsudnon nga Kampeon bilang Lakandiwa sa Pambansang Balagtasan ng Diwang Sagisag Kultura sang National Commission for Culture and the Arts kag PCEP SANG 2019. Sya nadawat nga Fellow sa Amelia Lapena Bonifacio Spoken Poetry Workshop sang Likhaan UP Diliman Institute of Creative Writing. Ang mga obra nabantala sa mga antolohiya sang 7 Eyes Production, Lampara Books para sa Binalaybay Pangbata, Ang Mayumo, Cotabato Literary Journal kag iban pa. 

REXCEL SAMULDE

Isa ka manunudlo sa Senior High School ang manunolat, mamalaybay kag manalaysay nga si Rexcel Samulde gikan sa Surallah, South Cotabato. Naangkon niya ang Bachelor's Degree sa Education Major in English sa Sultan Kudarat State University. Ang iya salaysay, Nalulunod Din ang Mga Isda, ginpasidunggan sang Cotabato Literary Journal bilang tagdaog sa Lagulad Prize. Nangin tagdaog man sya Lip-ot Hiligaynon Writing Contest nag ginsakdag sang Manug-isa South Cotabato Writers Association, kag amo man sa duha ka paindis-indis sang Sulat SOX. 

LUIS BERMOY BAHAY JR. 

Isa ka manunodlo si Luis Bahay gikan sa Tampakan, South Cotabato, nagkuha sang iya Bachelor's Degree sa Education Major in Filipino sa Mindanao State University. Ang iya mga obra nabantala sa Dagmay kag Cotabato Literary Journal. Subung, nagatungod sya bilang Sangguniang Kabataan Member. 

NIKKO LYNN LADERA

Si Nikko Lynn Ladera nagradwar sa Notre Dame of Marbel University sang Bachelor's Degree sa Pyschology kag nagtapos sang malip-ot nga kurso sa Human Resource for Health Management sa UP Manila. Sya isa man ka freelance human resource consultant kag training specialist, katapu sang South Cotabato Performing Arts Ensemble, manunolat sang dula, direktor, production and stage manager sang Apat sa Taglamig Productions Inc., mananayaw, performer, kag ambasador sang kultura kag taliambong. Nangin fellow sya para sa dula sa 2016 Davao Writers Workshop.

ANGELO SERRANO

Isa si Angelo Serrano sa mga maukod nga manunolat, ficcionista, gikan sa Polomolok, South Cotabato. Sya ang awtor sang zine nga gintigulohan, Open Cases from The Mindanao Journal of Esoteric Phenomenon. Ang iya mga sinulatan nabantala sa Cotabato Literary Journal.

ALVIN LARIDA

Si Alvin Larida isa ka manunolat, ficcionista kag manunudlo sang fisika kag kemistri sa Dole Philippines School sa Polomolok, South Cotabato. Sya nagdaog sa Mga Bagatnong Sugilanon para sa iya sugilanon, Ang Lanahan, kag ang iya dula, Ang Susu, nagdaog sa Balay: Sulat SOX Play Writing Competition. Ang iya mga sinulatan nabantala sa Cotabato Literary Journal. 

DOREN JOHN BERNASOL

Si Doren John Bernasol naggikan sa syudad sang Koronadal kag nagtapos sa kurso nga AB Filipino sa Mindanao State University. Kabahin sya sa lima ka napilian nga manunolat sang dula sa Mugna Dula Online Playwriting Workskop kag sa TAHAD: Online Hiligaynon Creative Nonfiction Writing Workshop. Ang iya Flash Fiction nga gintigulohan, Last Request nakabahin sa Top 5 sa Silap: SULAT SOX Flash Fiction Writing Contest 2020. Ang iya mga obra nabantala sa Cotabato Literary Journal.