Apat ka Binalaybay Para sa Mga Sapat sang Wayang ni Adrian Medina Pregonir

 

Apat na Tula Para sa Mga Hayop sa Parang

Adrian Medina Pregonir

Si Pangulo

Ginsugata ang suko

Nagsul-ob sulubako,

Naghithit sang tabako

Sa hunos nga nasulpo.

 

Si Meyor nga Pension Releaser

 

Sya nakigsulumbaki

Sa tigulang nga suli;

Iya dayon nga sud-ong

“Akon na imo pension.”

 

Si Nyor Pulis

 

Sya si tikas nga Hudas

Daw sa putyong nga puyas;

Kon may kuwarenta y singko

Daw sa hambog nga ‘bato’.

 

Duling nga Sapat

 

Sa dila ginasupsop

Sa dughan ginapulpog;

Dalitan nga kamandag

Ginahungit, sungaksungak!

TUHOY SA TAGSULAT

Sya ang awtor sang zine nga, Erotika Handumanan, kag  Hiligaynon Poetry Easy Recipes, mga hut-ong sang binalaybay nga nasulat sa Filipino, Hiligaynon kag gay language. Nagdaog sya sa Kasingkasing Press Prize for Hiligaynon Flash Fiction nga natitulohan, Ang Maambong nga Lalaki, kag ang iya salaysay nga May Katotohanan Pa Pala nagdaog sa Palanca Awards for Literature sa salaysay kabataan. Nangin fellow para sa Tula sa Davao Writers Workshop 2018 kag kabahin sang Tahad: Workshop for Hiligaynon Creative Nonfiction ni Dr. John Iremil Teodoro. Ang iya mga binalaybay nabantala sa nagkalainlain nga mga magasin, antolohiya kag balasahon, amo ang masunod: Liwayway Magazine, Tumandok Hiligaynon, Kasingkasing Nonrequired Reading in the Time of COVID by Kasingkasing Press, WE BEGIN IN AWE: Collection of Reviews, Cultural Center of the Philippines Ani, Spirits of the Philippine Archipelago, Dagmay Journal, TLDTD: Biannual Journal for Filipino Poets, Lakbay: Antolohiya ng Mga Tula by 7 Eyes Productions kag iban pa.

(Laragway gikan sa GGV)