Libagon ni Romeo Roullo

 

LIBAGON

ni Romeo Roullo

Sa pinasahing' pag-amba

naglinumpat ang mga tiki,

naglahay ang mga ayam

sa nagaamba nagapangindi!

Dalayawon sa kalibagon

wala na sing makalabaw,

bangod,

ngaa pa kutingkotingon

gitara nga may bingaw?

Apang, inday, bisan libagon,

ang ginatsungaw sang akon gitara

amo ang ginasinggit sang akon dughan:

tunhay nga sonata sang gugma. 

Ginbantala sa Hiligaynon Magazine, 1998

TUHOY SA TAGSULAT

Natawo sa San Agustin, Nanunga, Hinigaran, Negros Occidental sadtong Marso 20, 1935. Isa ka mapisan kag maukod nga manunolat sa Hiligaynon Magazine kag YUHUM Magazine. Nakaagom sya sang Pinasahing Padya gikan sa Quin Baterna Literary Contest para sa iya mga sugilanon nga ginbantala, ginbalhag sa ginaamutan nga magazine. Ang mga masunod nga sugilanon nga nakaagom sang padya amo ang masunod: Tuhay nga Duag sang Gugma, Sila Ang Mga Baganihan, Daku nga Baha, Madabong nga Kawayan kag First Prize para sa iya sugilanon nga natitulohan, Demolition. Ang iya nobelita nga Zorayda nakaangkon sang Third Prize sa Tumandok '79 sang YUHUM Magazine. Kapin 150 sa iya mga sugilanon kag 200 nga binalaybay ang nabalhag sa Hiligaynon Magazine. Subong nagapuyo sya sa banwa sang Banga, Cotabato Nabagatnan.