Tigtalanom ni Romeo Roullo

 Tigtalanom

Nalay-ang nga uyapad, natubigan.

Sabod nga ginhanda sa binati gintisok

mainandamon nga ginhanda agod katawhan 

may masap-an, may paglaom.

Unta saguron ini sang tingulan agod magdagaya

ang mauya nga duta, apang maghalong, 

basi agawon sang politikong' gahaman,

basi dugo ta ang mangin patubig liwan.

30 Hulyo 1997

Tuhoy sa Mamalaybay

Natawo sa San Agustin, Nanunga, Hinigaran, Negros Occidental sadtong Marso 20, 1935. Isa ka mapisan kag maukod nga manunolat sa Hiligaynon Magazine kag YUHUM Magazine. Nakaagom sya sang Pinasahing Padya gikan sa Quin Baterna Literary Contest para sa iya mga sugilanon nga ginbantala, ginbalhag sa ginaamutan nga magazine. Ang mga masunod nga sugilanon nga nakaagom sang padya amo ang masunod: Tuhay nga Duag sang Gugma, Sila Ang Mga Baganihan, Daku nga Baha, Madabong nga Kawayan kag First Prize para sa iya sugilanon nga natitulohan Demolition. Ang iya nobelita nga Zorayda nakaangkon sang Third Prize sa Tumandok '79 sang YUHUM Magazine. Kapin 150 sa iya mga sugilanon kag 200 nga binalaybay ang nabalhag sa Hiligaynon Magazine. Subong nagapuyo sya sa banwa sang Banga, Cotabato Nabagatnan.